Би ямар үзлэг шинжилгээ өгөх ёстой вэ?

Эрүүл мэндийн үзлэг шинжилгээг гурван үндсэн ангилалд хувааж болно. Эхнийх нь бол хорт хавдрын үзлэг шинжилгээ юм. Хорт хавдрыг эрт илрүүлэх тусам бүрэн эдгэрэх магадлал өндөр байдаг тул тогтмол үзлэгт хамрагдан эрт илрүүлэх нь чухал. Тэр дундаа ходоодны хорт хавдрыг эрт илрүүлж, эмчлэхэд бүрэн эдгэрэх магадлал 90 хувьтай байдаг. Хоёр дахь нь архаг өвчин юм. Цусны даралт ихсэх, чихрийн шижин, дислипидеми, элэгний архаг өвчин нь нэгэнт өвчилсөн бол насан туршийн эмчилгээ шаарддаг өвчин юм. Эрт илрүүлж, тууштай эмчилгээ хийснээр цус харвалт, миокардийн шигдээс, зүрхний өвчин зэрэг хоёрдогч хүндрэлээс урьдчилан сэргийлэх боломжтой. Гурав дахь нь халдварт өвчний шинжилгээ юм. Элэгний В, С, мөн хеликобактери, ДОХ, тэмбүү гэх мэт халдварт өвчнүүдийг эрт үед нь эмчилснээр тархахаас урьдчилан сэргийлэх боломжтой.

Эдгээр үзлэг шинжилгээг наснаас хамааран үүсэх өндөр эрсдэлтэй өвчинд чиглүүлэх нь чухал юм. Нийгмийн амьдралд хөл тавьж буй 20-30 насны хүмүүс хооллох зуршил, амьдрах орчноосоо шалтгаалаад насанд хүрэгчдийн өвчлөлийн эрсдэл өндөр байдаг. Иймд цусны даралт, биеийн жин, бөөр зэрэг үндсэн үзлэгүүдээс гадна сүрьеэний цээжний рентген зураг, элэгний В вирусийн эсрэгбиеийн шинжилгээ зэрэг үзлэгт хамрагдаж эрүүл мэнддээ хяналт тавьж эхлэх шаардлагатай.
40-50 насны хүмүүс хорт хавдрын таван том үзлэг (ходоодны хорт хавдар, бүдүүн гэдэсний хорт хавдар, хөхний хорт хавдар, умайн хүзүүний хорт хавдар, элэгний хорт хавдар) зэрэг нарийвчилсан үзлэгт хамрагдахаа мартаж болохгүй. Энгийн хэт авиан шинжилгээгээр ажиглахад хэцүү өвчний хувьд CT шинжилгээ хийх шаардлагатай бөгөөд эрэгтэйчүүдийн хувьд зүрхний өвчний шинжилгээ, цэвэршилтийн дараах эмэгтэйчүүдийн хувьд ясны нягтралыг хэмжих зэргээр ясны эрүүл мэндээ үзүүлэхийг зөвлөж байна. 60 наснаас эхлэн бие махбодийн үйл ажиллагаа ноцтойгоор доройтож эхэлдэг. Тиймээс өвчний явцыг удаашруулж, одоогийн нөхцөл байдлыг хамгийн сайн байлгахын тулд эрүүл мэндийн үзлэг шинжилгээ хийх шаардлагатай. Хараа, сонсгол, шүд зэрэг биед ямар нэгэн өөрчлөлт байгаа эсэхийг шалгаж, тархины цус харвалт, альцгеймер, паркинсон зэрэг настай хүмүүст элбэг байдаг өвчлөл, булчингийн тогтолцооны эмгэгийг илрүүлэх үзлэгт хамрагдах шаардлагатай.

Миний биед тохирсон эрүүл мэндийн дээд зэрэглэлийн үзлэг

Дэжон хотод байрлах Сон эмнэлгийн олон улсын эрүүл мэндийн үзлэгийн төв нь эрүүл мэндийн үзлэгээр мэргэшсэн эмнэлэг юм. Мэргэжилтэнтэй зөвлөлдөж, тархи, зүрх судас, хоол боловсруулах эрхтэн, таван гол хорт хавдар, эмэгтэйчүүдийн хорт хавдар зэрэг хэрэглэгчдийн хэрэгцээ шаардлагад нийцүүлсэн нарийвчилсан үзлэгт хамрагдах боломжтой. Мөн гэр бүл болж буй, үр хүүхэдтэй болох гэж буй хосуудад зориулсан эрүүл мэндийн үзлэг, хөгшрөлт болон архаг өвчнийг эрт оношлох, түүнээс урьдчилан сэргийлэх хөгшрөлтийн эсрэг сэргийлэх үзлэг, бусад төрөл бүрийн нарийвчилсан үзлэгт хамрагдах боломжтой өнжүүлэх үзлэгүүд ч бий.

Сон эмнэлгийн олон улсын үзлэгийн төв нь үзлэгийн зүйл, халдвар хамгаалал, өвчтөний аюулгүй байдал, эмнэлгийн бүртгэл зэрэг 1200 нэр төрлийн эрүүл мэндийн шалгуурт хамрагдаж, олон улсын эрүүл мэндийн байгууллагын үнэлгээний хорооноос (JCI) итгэмжилсэн эмнэлгийн байгууллага юм. Сон эмнэлэг нь 219 орчим орчин үеийн эмнэлгийн тоног төхөөрөмжөөр тоноглогдсон бөгөөд хоол боловсруулах эрхтний төв, эх барих эмэгтэйчүүд, хөх бамбай булчирхайн мэс засал, дүрс оношлогоо, өрхийн анагаах ухаан зэрэг олон салбарын мэргэжилтнүүд хамтран эмчилгээ хийж эрүүл мэндийн үзлэгийн дүн оношлогоог хийдэг. Шинжилгээгээр үнэн зөв оношлох боломжтой бөгөөд үзлэг шинжилгээгээр ямар нэгэн өвчин эмгэг илэрвэл эмнэлгийн тасагтай шууд холбож өгдөг тул зөвлөгөө авч, шууд эмчилгээ хийлгэх бүрэн боломжтой. Хамгийн сүүлийн үеийн тоног төхөөрөмж, мэргэжлийн эмнэлгийн боловсон хүчин, оновчтой системээр тоноглогдсон Дэжон Сон эмнэлгийн олон улсын эрүүл мэндийн төвд Орос, Монгол, Хятад, Англи хэлтэй эмнэлгийн зохицуулагч нар өвчтөнүүд нэг бүртэй тулж ажиллан төрөл бүрийн үйлчилгээ үзүүлдэг. Эрүүл мэнд, нийгмийн хамгааллын яамнаас гадаад өвчтөнүүдэд эмчилгээ үйлчилгээ үзүүлдэг эрүүл мэндийн технологийн тэргүүлэгч үзлэгийн төвөөр шалгарч байсан.

ДЭМБ-ын мэдээлснээр хорт хавдрын өвчлөлийн гуравны нэг нь урьдчилан сэргийлэх боломжтой, гуравны нэг нь эрт оношлогдож, эрт эмчилгээ хийснээр бүрэн эдгэрэх боломжтой, гуравны нэг нь зохих эмчилгээ хийснээр сайжрах боломжтой байдаг. Эмчилгээний арга, бүрэн эмчлэгдэх магадлал нь хэзээ илрүүлэн оношлосноос хамаарч өөр өөр байдаг. Тиймээс эрүүл мэндийн тогтмол үзлэгт хамрагдах нь энэ мэт өндөр эрсдэлтэй өвчнөөс урьдчилан сэргийлэх хамгийн сайн арга юм.